由於恩恩成日都同攝哥哥去郊遊，去親親大自然已經變咗一種生理需要，去旅行都唔例外。但礙於我都係無膽嘅弱小女子，唔敢自己去行上山，於是我地就去咗廈門嘅植物園同五緣灣濕地公園，而今次就想同大家介紹呢個巨型濕地公園。
五緣灣濕地公園佔地85公頃，面積同半個鼓浪嶼咁大，係廈門最大嘅公園，亦都係最大嘅濕地生態園區。目前共有9科25種濕地水鳥同17科29種山林及農田鳥類係度棲息。
不過呢啲都唔係重點，恩恩久違地係度玩咗次迷宮！認真，真係唔係我大個咗智力退化，蒌宮雖然矮，但咁大片嘅迷宮都好難免會行錯路啊！呢度仲有幾座小橋，本身係以佢地為目標去行入迷宮，最後行上去係為咗搵路出返去。久違地，搵返少少童真呢！
迷宮附近仲有大大片草地，好多人會係度坐低傾計、野餐，仲有唔少人係度訓晏教，勁嘆！呢度都有唔少人係度慢跑、踩單車，沿住 咁靚嘅風景健身，好似更容易達標呢！
係五緣灣區其實仲有好多景點，例如五緣大橋、月圓橋、帆船俱樂部等等，可惜時間唔夠，下次要預多啲時間黎行吓。
地址：福建省廈門市湖里區
沒有留言:
張貼留言