J.CO 好吃不貴的冬甩Cafe

如果你平時想食冬甩，你會想去邊度買呢?人地有Mister .Donuts、Krispy Kreme、Cronutt、Dunkin Donuts……而香港又真係比較少冬甩專賣店。

今次我地黎到油麻地呢間全球有超過250間分店嘅印尼冬甩Cafe–– J.Co Donuts & Coffee，佢地主打嘅冬甩口味有成26款，仲有細細隻嘅J.PoPs迷你冬甩添！真係甜食控嘅天堂啊！

呢度嘅冬甩15蚊一件，88蚊半打，有8成材料來自印尼，製法都跟足總店架！冬南亞地區出品嘅冬甩真係好好食。冬甩每日新鮮製作，發酵後再炸香，配上不同口味嘅配料，真係好吸引啊！

因為係印尼人喜愛重口味，呢度嘅冬甩都偏甜，口感煙韌，唔會覺得好油，我地今次試咗３隻口味，分別係Avocado Dicaprio、Royal Tea同Cheese Cakelicious，小編就比較推薦佢個Royal Tea，唔會太甜，而且內餡係伯爵奶茶味架！

除咗外買返去同朋友開心Share，係度食Donuts做下午茶都唔錯架，呢度都有唔少飲品比大家選擇，亦都有冬甩三文治同長法包三文治，就算唔想食甜品都有幾多選擇。.

J.Co Donuts & Coffee係香港有3間分店，岩岩好係香港、九龍、新界各一間，甜食控可以出動啦！

J.Co Donuts & Coffee

旺角彌敦道585號富時中心地下1,2號舖

灣仔軒尼詩道55號地下1及2號舖
將軍澳唐德街9號將軍澳中心地庫1樓B15號舖

最愛積積！ 超人特工隊2超級總部降落時代廣場

不知不覺，超人特工隊已經上映14年啦，小編都由一隻小薯仔長大成為一隻薯仔。今個夏天，超人特工隊2強勢回歸！除咗睇戲之外，呢個英雄家庭仲將佢地嘅超級總部降落係銅鑼灣時代廣場，Fans們，係時候出動啦！

今次呢度有超多打卡位！第一個就係成4米高嘅巨B積積，係入口同大家開心Say Hi！14年後積積都仲係一個百厭嘅BB，真係好可愛啊！



然後就係身長４米嘅彈弓女俠，係積積後面展現鐵騎英姿。E夫人都係度擺晒甫士，方死你唔同佢影返張靚相啊！


今次大家仲可以登堂入室同超人家族影相，成為佢地嘅一份子開心合照! 亦都有2個專區，比你搵小衝同小麗一齊Selfie，最後當然係要去積積，影返張16個積積與我，積積真係好可愛啊！



除咗打卡裝置，一眾家族成員仲會係7月21、22、28、29號真人現身同大家一齊玩，係總部入口同大家見面，千祈唔好錯過啦！

日期：2018年6月29日至7月29日
時間：10:00-22:00
地點：銅鑼灣時代廣場地面露天廣場

深圳遊樂團 LapsLaps 美式甜心Cafe

今次我地黎到呢間LapsLaps，相信有留意開深圳資訊嘅朋友都會聽過呢間Cafe，小編終於如願以償黎到呢度啦。我地今次係撘的士黎嘅，如果你想搭地鐵可以係深大站落車，A3出口出行大約700米就到啦。



呢間鋪由車道已經係粉紅色架啦！一上去就見到令人心心眼嘅跑車同入油機，另一邊係一排高腳椅，不過係影相之前，記得入去買咗野食先，如果唔係會比人趕架!



一入到去就係粉紅粉藍相間嘅裝修，好有美式Barbie Feel，呢度啲野食都唔平架，小編就咁叫咗一杯飲品同一件CAKE已經要93蚊人仔，野飲係幾好飲，但Cake就真係無下次啦。佢杯嘢上面仲冇個冬甩，個冬甩好食過個Cake幾多㗎都！






食完野，就係時候影相，基本上成間店都係影相位，除咗門口嘅跑車，仲有粉色雪櫃、仿車庫門口、霓虹燈、亦都隔開唔同嘅房同區域比大家影相，鋪頭唔算好大但就可以一次過影到唔同嘅場景，小編就最鐘意禮物房啦，又有邊個女仔唔鐘意拆禮物呢?


黎呢啲網紅店一定要早少少到，我地好好彩坐咗最後一張枱，再遲啲就要係外面熱住等啦！
呢度附近其實都仲有好多網紅店，下次有機會再同大家黎玩啦，BYEBYE:)


地址： 麻雀嶺工業區華富洋大廈210 電話： 18507520638/18320965081

郊遊習作 夏天行山就係要玩埋水！半月灣橋咀投奔玻璃水

最近小編變咗脆皮乳豬，因為大量咁同陽光玩遊戲，曬到黑媽媽。雖然係咁，但我都係樂此不疲地出去遊山玩水，點解？因為夏天浸係海入面實在係太過舒服啦！黑咗咪黑咗囉（跪求好用美白產品推介）T^T

今次我地就去呢個精心曬黑路線，半月灣->橋咀，入水曬完上水曬，行山吹乾又落水，聽落都流晒口水啊！首先我地係鑽石山撘92號巴士到西貢碼頭，再係碼頭轉街渡入半月灣($40來回，送薯餅換領卷一張)。

一落船就見到超清嘅海水，呢D玻璃水係颱風季就買少見少，大家要把握時間啊！半月灣水清沙幼，閒日都有唔少人黎玩水，而且呢度暫時都未見到大家所講嘅海毛蟲嘅身影，大家可以安心玩水。（頭盔：不過都要留意新聞先好去玩，小編去戈日冇唔代表以後都冇）

今次我仲趁機會試咗Urban Delay旗下BRONX嘅新產品，真係超級持久，落海水都冇問題。

小編自已試完覺得佢嘅眼線同粉底最好用，眼線液好好畫，２枝都好防水。重點係小編唔小心揩咗D粉底係大脾，返屋企沖完涼都仲係度，但用卸妝產品輕輕一抹就甩，真係好抵讚啊！

玩完水我地就出發去橋咀，記得冬天嘅時候小編都有同大家介紹過呢個地方。

今次我地係半月灣嘅燒烤場出發，燒烤場隔離有條樓梯，沿路行一個鐘左右就到。呢條路線好易行，冇大上大落，大多數都鋪好石板路徑，就算游完水行都唔會攰。重點係成條路得1.6KM但中間都有唔少休息嘅長椅，無籍口唔行啦！

沿路都見到西貢唔同海灣，有好多小編都未去過，好想去啊！慢慢接近橋咀，就會見到上次小編所講嘅連島沙洲，由高處望落去，個島好似玩具咁好的色，仲見到橋頭嘅燈塔添！

到達橋咀，呢度嘅沙灘就無半月灣咁靚，明顯係粗粒沙石，但水一樣好清，小編次次黎都會遇到有主人帶狗狗黎游水，愛狗嘅你一定要黎，真係好得意架！

留意返因為價錢唔一樣，只有半月灣嘅船飛可以係橋咀回程，上船前一定要問清楚船家啊！

難易度：⭐

落船就係沙灘，山徑易行，退潮不防行埋過橋頭啊！

打卡度：⭐⭐⭐⭐⭐

玻璃水已經係無敵，行少少路又有無敵海景，有興趣仲可以玩浮潛添！

設施完善度：⭐⭐⭐⭐

兩邊碼頭附近有都燒烤場、洗手間同小食亭，不過如果想沖身，呢度嘅水流就真係細咗啲（小編係唔沖直接返西貢）

(出賣一下：攝哥哥攰了)

最後提提大家行山要準備充足，量力而行；最緊要係愛惜香港大自然，自己嘅垃圾自己帶走啊！今次嘅郊遊習作係咁多，我地下次見啦！拜拜！