如果大家有睇開恩恩寫嘅文章，會發現我之前去咗廈門小旅行，帶大家去左網紅打卡點廈門仙人掌園，亦都分享咗大熱咖啡屋Thank you Cafe，大家可能會誤會小編我嘅旅行係咪就曾係識去打卡熱點。但其實，我都好鐘意捐窿捐罅㗎！今日就想帶大家去廈門思明區台灣小食街附近嘅呢間阿吉仔吉治百貨，一腳踏入八十年代。
阿吉仔吉治百貨坐落於八市附近嘅一棟老建築，樓高五層，每一層都有唔同嘅驚喜，集書店、雜貨、茶室、餅鋪、咖啡館於一身。
一樓係阿吉仔餅鋪，小編買咗黑色嘅鳳梨酥，同埋山楂糕，價錢係台灣鳳梨酥嘅1/3，但同樣好食，山楂糕酸酸甜甜，做嘢做到攰食返塊提提神，成功佔據恩恩嘅枱面：）
二樓叫做「百分百廈門」，除咗展示以老花磚圖案做創意嘅產品之外，仲有一區陳列出好多8、90年代嘅舊物品，例如舊式電視、書櫃、日用品等等，如果你係同啲長輩黎，一定會勾起佢地好多回憶。
三樓係時光書局，收藏咗許多來自日本同台灣嘅生活美學、人文旅遊等書籍，書架上貼住泛黃嘅名信片，仲有好多懷舊生活用品，大家唔只可以係度睇書，呢度充斥住好多你係老一輩口中聽過嘅老物件，鋁製熱水壺、打字機，雖然佢地都舊啦，但對我地黎講反而好新鮮！
四樓係Cafe，大家可以坐低靜靜地呷口茶食啖餅，不過提提大家，呢度只用手機落單，想係度食野記住開通國內嘅支付方法啦！
五樓係烏龍茶室及戶外花園，好有味道，好天嘅時候企出戶外花園仲可以見到對面街市，剎那間，望住街景，真係有一種回到80年代嘅感覺呢！
靜靜雞話比大家知，其實係呢間鋪行前少少，有間排曬長龍嘅餅鋪，唔止平，仲堅係好好食，鳳梨酥、綠豆餅都平到一個點，小編本身想帶返黎比攝哥哥嘅手信就咁落曬我個肚XD 大家有興趣自己去探索一下啦！
阿吉仔吉治百貨
地址：廈門市思明區開元路116號(廈門第八菜市場旁)
電話：0592-2057-116
營業時間：9:00-21:00
沒有留言:
張貼留言