窮人食家 紅磡平民美食

今次我地窮人食家黎到紅磡搵野食，紅磡一向都出名多野食，有好多街坊老字號都隱藏係巷弄之中。今次我地五十幾蚊食咗3間鋪頭，仲要係超飽！


紅磡雞蛋仔





紅磡雞蛋仔其實就出晒名好食架啦！今次我地黎唔係食佢嘅雞蛋仔，而係食佢嘅鮮果香蕉班戟，叫咗之後店員即刻拎塊熱辣辣嘅班戟包住啲生果比你，簡單好味得黎感覺上又幾健康(自我催眠)，重點係佢真係好好食架！一份只係$11，抵食！


秘制牛什





今次叫咗細牛什$20，牛肚、牛肺、牛腸等等都好入味，煮得好軟熟，唔會有怪味。蘿蔔大大舊好鮮甜，雖然唔係小編食過最好食嘅牛什，但水準同性價比都好高，而且隔離就係紅磡雞蛋仔同奶茶店，掃街冇難度啦！
 
林記小食




然後就係出晒名嘅林記小食，小編去嘅時候係閒日午市後，所以冇乜人。本身想叫２樣野湊夠＄５０，但最後都抵唔住叫咗三寶＄２５（有腸粉、魚蛋同燒賣）燒賣有分牛肉同魚肉餡，今次我地叫咗魚肉燒賣，魚蛋佢都好好人咁比我地叫一半辣一半唔辣，方便大家Share食。腸粉都好高質，一個字，掂！



今次我地2個就食得好滿足啦，你地又有咩小食推薦呢？話比小編知，等我又去試吓！