紅磡狂食 紅磡冰室 唔該要份常餐B

夏天最開心就係訓到自然醒再樓下茶記食返個Afternoon Tea，一黎依肚、二黎可以睇下電視、涼下冷氣，仲可以約埋朋友吹下水添。可惜小編要返工，呢啲都係我對暑假嘅美好回憶。為左重拾昨日重重嘅休閒美好，我地黎到紅磡呢間紅磡冰室。

黎紅磡冰室就一定要食瑞士汁雞翼撈公仔麵，見到呢度過半數客人都叫咗呢個常餐B，就知有幾好食啦！一碗公仔麵有3隻雞翼，全部都上晒色入晒味，公仔麵都好入味！雖然個樣有啲頹，但其實頹餐養活了無數香港市民，最緊要好食！

常餐B會跟埋蛋同烘多士，小編強烈建議叫炒蛋＋蒜蓉包，兩樣都好地道好好食！

比起現今健康少少又流行嘅烘多士，以前嘅西多先係神級美食。呢度嘅懷舊冰室西多極邪惡，真係好好食，炸得岩岩好，邊邊仲有D薄薄嘅蛋絲，淋上練奶同糖漿，係香港人嘅味道！雖然真係好肥，但好食到停唔到口啊！

雖然呢度就冇乜賣相打卡，落單啊姐都冇贈送笑容(但唔惡)，但間唔時食下茶記冰室真係唔錯架！

紅磡冰室

地址：紅磡明安街25號地舖

電話號碼：23648388

營業時間：07:00 - 23:00