上次同大家介紹咗舊街市嘅熟食檔，其實新街市一樣都咁好食!今次我地黎到藍田新裝修嘅啟田市場，市場外圍開滿小食店，有啲仲開到好夜添!等我地睇下有咩食啦!
#豆腐時代
呢間就專賣豆制品，即叫即整，由炸豆腐到豆花特飲都有，有冇人好似小編咁超愛豆制品?呢度可以一次過滿足到你唔止3個願望啊!
一口豆腐 $15
即叫即炸，小編雖然唔係即刻食，放咗一陣都仲係好好食，唔會有油溢味。建議大家唔食住就要打開個盒，如果唔係就會濕晒，味道就會打折扣啦。
#真味皇
真味皇就有好多經典小食同熟食，有飯有點心，雞肶涼拌乜都有，呢度仲有火鴨碗仔翅，見到都流晒口水。
牙籤雞 $20
牙籤雞其實就好似雞米花一樣，不過每粒都用牙籤篤住黎炸，雞肉幾嫩，冇雪藏味，不過廿蚊黎講份量就少咗啲。
#皇后餃子
呢度真係合晒小編胃口!小編都好喜歡食餃子架!!!佢嘅煎餃有好多唔同口味，多數都係$10/3件，即叫即煎，小編當日係度都排咗一陣先買到，好多人都黎幫襯架!
京蔥牛肉餃 $15/3隻
小編覺得小貴，不過料好足，食落口唔會好油，但比想像中少肉汁。15蚊3隻嘅口味比較少見，仲有素餃可以選擇，不過小編覺得下次都係食返10蚊3隻大路餡料餃子抵啲。
燒賣王子
燒賣王子就梗係賣燒賣啦!除咗燒賣等點心之外，佢地仲有鐵板炒粉麵系列，其實賣嘅野同中學小食部好似，真味皇就賣火鴨翅豉油肶，呢度就賣菜肉翅炸雞肶，住係附近嘅人會唔會太幸福!?
鐵板豉油王炒河 $15
可能佢地真係太忙，小編覺得個河粉炒得唔係好夠味，D河粉仲未炒散就比咗我，入面仲有好多白色未上到豉油嘅河粉，有少少失望。
自家手工燒賣 $15
好大浸鯪魚味，而且粒粒燒賣都好彈牙，雖然小編唔喜歡食魚，但誠意推薦比唔介意食魚又鍾意食燒賣嘅朋友!
#台灣人
雖然間店店名叫台灣人，但店家係講好流利嘅廣東話。呢度主要係賣台灣小食，亦都有唔少得嘅台式飲品同鹵肉飯，相信一眾台灣美食Fans一定會鐘意。
招牌刈包 $20
哇!香港都有得食刈包!刈包類似中式漢堡包，會將滷肉同酸菜等配料夾係扁身白饅頭入面，再撒上大量花生粉，係台灣嘅國民美食。刈包係香港好少見，呢度有得食真係好驚喜，雖然比起台灣食到嘅都有少少距離，但真心推介大家黎試下，香港食到嘅入面算係非常唔錯!花生粉再多D就好啦!
除咗以上幾間食店，呢度仲有清玉、豪大大、包點先生等等小店，真係可以食一個星期不重樣都仲未食晒啊!
沒有留言:
張貼留言