郊遊習作 藍田公園清幽郊遊徑

最近成日都落雨，搞到個人好冇活力，計劃唔到郊遊呼吸新鮮空氣。其實落雨真係唔可怕，只要唔係傾盆大下或者打雷，做足準備都可以照樣出發，行D安全易行嘅路線。
.
之前同大家介紹過小夏威夷徑，如果大家都係覺得中間少少泥路有危險，今次小編就同大家介紹呢條全程石屎路嘅路線，藍田公園至馬游塘村。




大家可以係藍田站搭216M巴士，係藍田公園落車，行上少少就會見到藍田公園嘅入口啦！沿路向上行。



經過公廁會見到樓梯，上樓梯向上行少少去會見到一個休憩地方，穿越休憩處上對面嘅樓梯。如果都係分唔清邊條先岩，附近有指示牌，往安達臣徑出口行就啱啦！


一路行到藍田公園嘅最高點，呢度只有200米高，同時亦都係藍田公園嘅安達臣徑出口，向左轉，會見到有拜神嘅地方，再行前少少會見到間廟，係廟旁邊有一條石級，行上石級分岔轉左繼續上。


上到去平地之後好快就會見到鐵絲網，直行唔好轉彎，沿路綠意盎然，鐵絲網內一大片空地，途中仲見到一個小小嘅忠義坊，好有傳統味道呢！




呢度都係涼亭比大家休息，再行前就會見到往馬游塘村嘅指示牌，行多一陣就會望到觀塘晨運徑嘅路牌，一路直行落山，直到見到車場轉右，就到村口啦。




分岔路要向上走，一路沿車路行15分鐘左右就會出返寶琳路，呢度有小巴同巴士出返去附近地鐵站，都幾方便。

難易度：★

全程可屎路，不過落雨就記住著防滑鞋。

打卡度：★

其實就唔算有咩特別好睇，不過落雨都可以親親大自然，心情都開心啲。

設施完善度：★★★

都算多指示牌，亦都有休息嘅地方。

最後提提大家行山要準備充足；最緊要係愛惜香港大自然，自己嘅垃圾自己帶走啊！今次嘅郊遊習作係咁多，我地下次見啦！ByeBye！