深圳遊樂團 現代感傳統結合燒肉店 嘻遊記

話說之前小編又去咗深圳玩，去咗大名鼎鼎嘅燒肉店嘻遊記，真係好值得Encore再Encore啊！小編去嘅係萬科里分店，由外牆已經感受到嘻遊記嘅裝修非常之科幻，銀色外牆加上白光嘅壁燈，真係好有Feel啊！

唔鐘意等位嘅小編我為咗佢足足等咗一個鐘，好在可以用微信Check等位情況，等緊嘅時候可以係附近行下影下相。

一入去，店舖入面比外面更靚！店內掛住一顆顆燈籠，七彩繽紛真係好靚。

入面有好多唔同套餐選擇，Ｄ肉好似下午茶一樣，會放係三層架上桌。我地今次就叫左大神級人氣組合，入面有嘻遊牛將軍、三昧真火烤牛五花同俺老豬更牛，一睇就諗起西遊記嘅故事。

除咗組合，仲有好多單點美食，小編仲叫咗香腸同雞肉。另外佢嘅海鮮真係唔錯架，小編食左帶子同蝦，不過就小貴，逐隻計錢，但上桌更加開心，烤好嘅海鮮放係熱石上，感覺超正！

因為小編想食菜，所以叫咗小蔬女，不過有啲失望，其實佢即係部隊鍋，蔬菜唔算好多，如果想食菜不如直接叫菜類更好。

佢嘅飲品都好靚，裝係燈泡入面，都幾好飲，但份量就有啲少，真心燒肉就係要配大大杯汁飲先開心啊！

大家可以自己動手燒肉，店員會好勤快甘幫你換燒板，其實大家都可以叫店員幫手，咁就唔怕唔好食啦。