係中環搭船過愉景灣，大約半個鐘就到，我地首先去咗愉景灣北邊先，所以要係圓形廣場後面搭巴士去愉景灣北。
係總站落車，穿過愉景北商場就係心鎖長廊，一個個心心入面扣住一對對愛侶嘅情話，好浪漫啊！
晒完之後就梗係要入室內涼返一下，係愉景灣北商場有幾間食肆，間間都好吸引架！小編就黎咗呢間墨西哥餐廳，有興趣記住留意我地嘅介紹。
抖完冷氣就向愉景灣酒店行，呢度有著名嘅三角型教堂，打卡一流啊！好多人係度影完相就走，但其實沿海邊行落去，會有好大個公園，大家可以係度野餐、玩遊戲。公園嘅另一邊係人造景觀，有人工湖、湖中走道、仲有人做小沁瀑布，係度影相真係好靚！
然後我地就可以出返大路等巴士落沙灘，大白灣係一個人工沙灘，由海南島運來的優質細沙建成，總長約四百米。係度最吸引就梗係佢嘅沙灘遊樂場，呢度有滑梯、搖搖板、平衡圓板、繩網鞦韆、轉轉圈等等，除咗小朋友開心，好多人都會黎對住個海玩韆鞦，順手打返個卡，勁Chill啊！呢度仲設有沖身設施及更衣室，沙灘旁邊都有簡單沖身設備，玩完水換衫都好方便。
難易度：★
郊遊唔一定係行山，去離島睇下海玩下水都係一個低難度選擇。
打卡度：★★★★
好似置身外國一樣，教堂同沙灘都係打卡聖地。
設施完善度：★★★★★
愉景灣嘅設施可謂所有離島中最完善之一。
愉景灣真係好有異國感，睇得出佢地管理團隊嘅用心。大家去放鬆之餘記住要好好保護佢地，唔好亂拋垃圾啊！去郊外地方記住做足防蚊同防曬措施、要適時保充水份，咁先玩得盡興。今次郊遊習作係咁多，我地下次見啦，byebye！
沒有留言:
張貼留言