上班一族係外面用餐多數多肉少菜，個個變成食肉獸，加上進入熱辣辣嘅夏天，最易令人飽飽濟濟，出現食慾不振嘅現象，冇晒胃口，不如來一餐無肉食，平衡返飲食健康，清淡腸胃。
無肉食，裝修以清雅簡約爲主，牆壁上幾幅顏色豐富嘅畫作加以點綴，環境令人好舒服。
主菜有炒麵，銀針粉，好彈牙，唔會炒過頭變到好乾，油而不腻 。
炸豆腐同炸蕃薯極力推介， 炸豆腐外脆內軟, 番薯切到好薄，入口香甜軟糯，雖然係炸物，但唔會過於油膩，令人回味無窮。
蘿蔔糕，冇任何添加物料，純蘿蔔，好軟，入口即容。
椰汁紫米露就食得多，紫米糕好少見到，口感清甜爽滑，透心涼。
前菜冷盤有涼拌青瓜，酸酸甜甜，好開胃。
仲有三款沙拉醬供選擇，有蛋嘅都會加以標示，好細心。
菜方面有好多種選擇，翠玉瓜，菜心，娃娃菜，三色椒等等，爽脆清新，外表雖唔精緻 ，但勝在好新鮮，好有家常便飯嘅味道。
綠豆沙、紅豆沙，好綿好沙，落足料，好香嘅豆味，又唔會過甜，消暑解毒，熱辣辣嘅夏天就最合適不過。
用餐後記得要自行清理餐具及垃圾，將餐具及廚餘分類好。
地址：旺角洗衣街88號2樓
訂位熱線：2889 2938
營業時間：
午市：11:30 - 15:30 （午餐繁忙時間限時75分鐘）
晚市：18:00 - 22:00 （晚餐繁忙時間限時90分鐘）
成人收費：
午餐：逢星期一至五 $68， 六、日、假期$78
晚餐：逢星期一至四 $118，五、六、日、假期 $138
身高1.2米以下小童收費：
午餐：星期一至五 $48，六、日、假期 $58
晚餐：星期一至四 $88，五，六，日假期 $108
沒有留言:
張貼留言