郊遊習作 衛奕信徑第四段東山半日遊

今次我地去到衛奕信徑第四段，上東山行返一轉。東山海拔高544米，屬於馬鞍山郊野公園，雖然唔係好出名嘅地方，但呢條路線會經過唔少睇風景嘅地方，放假去行吓都唔錯架！




首先可以搭91號巴士係井欄樹村落車，入村就會見到好心村民整嘅指示牌，跟住行就會去到大藍湖路。進入林路之後會上到去黃麍仔，係附近有座荒廢咗嘅別墅，唔少人上咗去睇風景，不過我地就搵唔到呢間別墅嘅資料，就咁睇可能係起起下放棄嘅物業。



接落黎就向住衛奕信徑第四段行，一路都有路牌，留意返如果行飛鵝山道係去唔到東山架，經過百花林之後係路口左轉條路先岩，有機會再同大家行上去，要花更多體力，但都好值得！係路口轉左之後一直行上坡，上到頂就沿平路遊走山頂，之前係腳脾蓄埋嘅乳酸全部都抵返晒啦！







一路風景都好好，上到東山之後可以原路折返，向扎山道方向行，到達車路之後向下走好快就出返去清水灣道，可以係德望學校搭巴士離開。

難易度：⭐⭐⭐⭐

前段比較輕鬆，中後段需要體力爬坡。

打卡度：⭐⭐⭐

可以遠眺西貢，大埔等地，亦都有廢置別墅，頗有特色。

設施完善度：⭐

中途無公廁及補及，去洗手間要再行上基維爾訓練營下面先有公廁。

最後提提大家行山要準備充足，量力而行；最緊要係愛惜香港大自然，自己嘅垃圾自己帶走啊！今次嘅郊遊習作係咁多，我地下次見啦！拜拜！