首先可以係西鐵屯門站C出口嘅巴士站搭K52號巴士，係沙埔崗177號落車。一落車就到咗沙灘啦！係呢條呢條長長嘅沙灘散步好舒服、好浪漫架！回頭望可以見到龍鼓灘發電廠，天晴嘅時候仲可以遠眺澳門新葡京、珠海市一帶，景觀好開揚。
行過沙灘，會經過村公所士多同燒烤場，之後就會見到中華白海豚瞭望台。沿樓梯拾級而上，風景都越黎越靚，上到去會有一座涼亭，再上去就係瞭望台，呢度風景好開揚，天氣熱嘅時候仲可以見到中華白海豚添！
瞭望台隔離有一條小徑，通過小徑會上到隔離嘅小山崗，不過呢度有唔少風水地，介意就唔好過去，上到去小山崗見到嘅風景會更加廣闊，呢度有幾舊大石，坐上去睇風景好舒服架！仲有人係度畫咗個心心添！
難易度：⭐
除咗去上山崗要小心砂石跣腳，基本上都係鋪好嘅路。
打卡度：⭐⭐⭐
睇日落一流，夏天仲可以睇到中華白海豚同天空之鏡添！
設施完善度：⭐⭐⭐⭐
指示好清晰，有士多有廁所，睇完日落仲可以落返去BBQ。
最後提提大家行山要準備充足，量力而行；最緊要係愛惜香港大自然，自己嘅垃圾自己帶走啊！今次嘅郊遊習作係咁多，我地下次見啦！拜拜！
沒有留言:
張貼留言