甘い媽媽日 甜蜜美食大匯集！

聽日就係母親節咩!呢一個星期我地同大家介紹咗咁多好味嘅甜品，係咪心郁郁呢？等我地一次放晒佢地出黎，等大家可以依照唔同嘅特色同媽媽以最窩心嘅甜品過一個甜甜蜜蜜，溫馨又美好嘅母親節啦！

Joyful Dessert House

甘い媽媽日特別推薦：芒果拿破崙、薑汁梳乎厘

芒果拿破崙以新鮮勁靚呂宋芒、吉士同酥餅砌成，芒果日日新鮮運到，酥餅亦都係每朝精心烘焙，就好似細個媽媽每朝為你準備早餐一樣用心。芒果嘅鮮甜可以帶黎活力，加上義大利雪糕香甜可口，治癒媽媽為我地付出嘅辛勞。

薑汁梳乎厘口感非常軟綿香甜，薑汁比人一種溫暖嘅感覺。同樣伴上美味嘅義大利雪糕。如果你想多謝媽味對你溫柔體貼、無微不至嘅愛，呢一道甜品就啱晒啦！

地址：黑布街74號藝興大廈地下2及3號舖
電話號碼：9688 1772／2856 1886

地址：銅鑼灣駱克道464號鑽石大樓地舖
電話號碼：2556 2688／9688 1772

Tea Saloon by AnotherFineDay

甘い媽媽日特別推薦：Eat Clean & Be Merry - Vegetarian Afternoon Tea、九型人格茶

Eat Clean & Be Merry - Vegetarian Afternoon Tea非常適合同媽媽黎品嚐，一黎佢非常健康，所有食物都不採用白糖，改以健康嘅甜味代替；另一方面除咗Muffin之外，所有小食都係Gluten Free，食落健康無負擔；最重要嘅係呢個其實係一個素食下午茶， 就算係注重養生唧素食者媽媽都可以享受呢個美味嘅餐點。

呢度仲有一個好有特色嘅揀茶程序，就係以九型人格去推薦唔同嘅茶比大家，小編試咗真係覺得好準！而且推薦嘅茶亦都好合心意，黎同媽媽HighTea仲可以對被此有更深嘅了解同溝通。係時候好好咁了解一下媽媽，感情會更好呢！

Bakery Plus

甘い媽媽日特別推薦：永生花水晶燈雲石蛋糕、康乃馨水晶燈蛋糕

永生花水晶燈雲石蛋糕超級夢幻，共有5吋、6吋、7吋3個尺吋，每一個水晶燈入面都有一朵超靚嘅玫瑰，大家可以選擇自己喜愛顏色嘅玫瑰花，仲可以自己搭配雲石面嘅顏色。水晶燈亦都有分手動著燈嘅普通版同以魔法棒點燈嘅豪華版，包你氹到媽媽心花怒放，變成一個少女！

今個母親節，Bakery Plus推出節日限定嘅康乃馨水晶燈蛋糕，即日起至13/5都可以預訂，6/5日前預購仲享有95折添！每個水晶燈内配有3朵自選顏色嘅康乃馨，以毋忘我同滿天星作襯花。康乃馨共有深紅、粉藍、白、粉紅、粉紫同香檳金6隻色作選擇，比你以媽媽最喜愛嘅顏色花朵向媽媽表達感激之情。

Facebook：https://www.facebook.com/bakeryplusss/
查詢WhatsApp：9269 7818
地址：尖沙咀河內道18號K11購物藝術館B1樓Market Place內

曲奇四重奏

甘い媽媽日特別推薦：母親節曲奇禮盒、伯爵茶蝴蝶酥

係每一盒母親節曲奇禮盒入面，都有一塊愛心形狀嘅母親節特別餅乾。幫你同媽媽表露你對佢嘅感謝同愛。

佢地最新推出嘅口味就係伯爵茶蝴蝶酥，英式伯爵茶配上蝴蝶酥，香脆中又帶茶香，出奇地好食！沏一壺茶同媽媽一齊悠閒地過一個甜蜜母親節啦！

地址：九龍城獅子石道9A地下
電話：2382 2817
其它分店資料請到官方網站查閲。

Lia's Bakery

甘い媽媽日特別推薦：自製曲奇花藍、夢幻訂製馬卡龍

母親節其實可以親手整一個曲奇花藍比媽媽，簡單、用心又大方，仲可以比媽媽感受到你對佢嘅用心，詳細教學請睇Homita YouTube影片。

Lia's Bakery主要其實係接整餅訂單，例如呢個超可愛嘅獨角獸馬卡龍，唔止賣相討好，仲好好味架！最近Lia's Bakery仲做緊優惠，日本食用花曲奇同食用花馬卡龍都做緊優惠，馬卡龍只要2打就可以起訂，訂黎去野餐、開Party，送禮都唔錯架！想訂就去佢Facebook搵佢啦！

訂購/查詢WhatsApp：6491 2087

Layer's Cafe & Pancake

甘い媽媽日特別推薦：季節限定芒果班戟、玫瑰Latte

季節限定芒果班戟

呢度嘅厚班戟非常鬆軟，好似食雲咁樣，軟軟嘅厚班戟入口即化，牛油同牛奶嘅味道即時散開，簡直係神級滋味啊！5月踏入初夏，店主都以節季食材呂宋芒推出芒果班戟，新鮮嘅芒果肉同芒果醬汁同甜甜嘅厚班戟好夾，食唔停口！

母親節唔一定要送花嘅，不如就點一杯玫瑰Latte比媽媽，以濃濃嘅玫瑰味去感謝媽媽一整年對自己嘅愛同付出，相信媽媽一定喝在口中，甜在心裡呢！

地址： 九龍城福佬村道福佬村道19-25號
電話： 2791 0633

夏雪

甘い媽媽日特別推薦：竹炭黑芝麻窩夫、竹炭黑芝麻牛奶

地址：西環堅尼地城厚和街6-18號滿發大廈地下D舖
電話號碼：5541 0655

地址：大圍積富街31號益富閣地下3號舖
電話號碼：5698 7729

其實對媽媽好，真係唔係就咁一日半日嘅陪伴，甜品可以令到人感到幸福、充滿活力，就好女媽媽對子女嘅愛一樣。所以唔止母親節一日，周不時同媽媽一齊去食啲美味嘅甜品，慰勞吓為你不辭勞苦去付出嘅媽咪，以甜蜜嘅幸福感回饋媽咪嘅愛啦！