元朗狂食 日式街坊小店丼家

元朗一向係美食集中地，小編就不時都會去搵野食，尤其係小店。今次小編就去咗YOHO MALL對面嘅丼家，試下好唔好食。

店面其實都幾靚，仲有少少連鎖集團嘅氛圍，小編當日係飢腸轆轆之下毫不猶豫地衝咗入去。

入店都幾乾淨，鋪位唔算大，但都幾企理，吧檯放晒清酒都幾有Feel。Lunch Set都有幾多選擇，今次我地就揀左牛舌丼同滑蛋雞肉丼。

一份午餐會跟一份卷物、一份炸物、一碗面豉湯同紙包烏龍茶。

滑蛋雞肉丼其實賣相幾好，但有一舊雞仲係有粉紅色，反而個蛋就老咗少少。

牛舌正常發揮，厚切都唔會韌，而且幾入味。

不過小編真係不得不提佢個飯，真心唔係好食，雖然都明白要控制成本但係個飯真係好無誠意，以丼為名嘅鋪頭個飯真係令人有啲失望。

事後上網睇，應該晚市嘅水準會好啲，但以飯嘅質素黎講真係同其他日式食肆有啲差距啊！

丼家

地址 ：元朗鳳攸北街2-6號永富閣地下14B號舖