神啊，賜我力量吧！那些年盛傳的許願法

唔知你地細個有冇許過願呢？小編自己就有聽過好多許願方法，自己都實行過唔少。唔理最後有冇成功，許願本身都係一件好美好嘅事，你又有冇使用過呢D方法偷偷許過願呢？

#蠟燭許願

其實呢個方法最多人做，小編每年生日都會好好地許願呢！為咗令願望成真，每次我都只係許一啲自己能力內可以達成嘅願望，算係變相地係許下目標，但成真嘅時候真係好開心！

#對流星許願

據講呢個許願方法係沿自一個北歐神話：你只要在流星消逝前許完願，願望就能成真。就好似賤熊30入面男主角都係向流星許願而令Ted獲得生命，你又有冇試過呢？

#心有靈犀許願法

只要同身邊嘅人同一時間不約而同地講咗一樣嘅說話，搶先拍拍對方嘅額頭許願，願望就會成真。(感覺呢個方法雙胞胎會成日用)

#四葉草許願法

傳說只要你搵到四葉酢漿草，對住佢許願就會成真。

#一百架飛機許願法

只要捉住天上嘅飛機許願，將願望食落肚，集滿一百架你嘅願望就會成真。

#手心許願法

呢個其實係幫自己增加勇氣嘅方法，你怕咩就將佢寫係手心許願，再將願望食落肚，你將不再害怕。

#手作許願法

摺心心、摺星星、摺飛機、摺紙鶴、摺花都係細個流行嘅許願法，大多都係摺夠一定數量你嘅願望就會成真，仲有人會將呢個願望送比人，好浪漫啊！

#許願池

其實就算大個囡，小編見到許願池都係會用散銀小小地許個願，雖然我知最後都係有人會收集晒啲散銀，但仍然忍唔住對佢許願嘅慾望啊！