窮人食家 街市內嘅美味點心 城記飯店

雖然呢幾年新興咗好多新式街市，但小編對蕭街市嘅熟食檔真係情有獨鍾。差唔多每一個大街市都有街坊先識去嘅熟食檔，今次我地就黎到上水石湖墟街市，入面有一間城記飯店，好多人都會黎食點心架！

我地下晝2點幾入去，好多點心都賣晒，好彩仲有小編最鐘意嘅蝦餃，仲叫咗個腐皮卷同雞肉粉皮，因為怕唔夠飽，我地仲叫咗個北菇雞盅飯。

佢嘅點心真係好好食，其實出面已經好少地方賣雞肉粉皮，其實即係雞肉腸粉，腸粉皮唔算好薄，但入面好多餡，真係唔錯架！

腐皮卷同蝦餃同樣都好多餡，味道都好好，但價錢比一般茶樓更平，街市價真係開心好多。

今次最好食就係呢盅北菇雞飯，不幸地佢冇咗粒菇，但佢呢個雞飯真係好好食，同出面連錯中式點心店嘅好大分別，呢啲先係細個食盅飯嘅味道啊！

係度食點心仲有一個好處，就係你可以選擇唔嗌茶位，變相性價比又高咗。今次我地就另外叫咗凍檸樂，出面熱辣辣飲返杯檸樂真係嘆喇！

所以話，識食一定係去街市食，你地附近嘅街市又有冇好味推薦呢？記住同小編分享留言比我啊！