郊遊習作 雨後更好看! 小夏威夷徑睇瀑布

最近落咗好多日雨，好多戶外活動都付之一炬，小編趁個風走咗之後去咗行小夏威夷徑，因為呢度嘅路鋪得好好，就算落雨都唔怕。而且雨天嘅時候佢個瀑布更加澎湃，其實落雨，又有咩好怕喎，做足安全措施就可以開心出發！

首先係鑽石山搭91/92號巴士，係井欄樹村落車，向車頭行會見到行人隧道，入去經樓梯嗰邊上，行前少少就見到入澳頭村嘅路口。

好快我地就聽到水聲啦，水壩中間有一個缺口，雨後流水怒衝而下，好壯觀。一路向澳頭方向行，直到見到小夏威夷徑路牌嘅分岔路轉入去。小夏威夷徑嘅開始係一個山谷，山谷入面開咗好多牽牛花，好可愛啊！

然後我地就入森林小道，石磚地加上青綠色好似童話咁啊！一路好平緩，雖然地下濕立立但只要有防滑鞋其實都好安全。行咗一陣就會見到藍色休憩設施，過咗隔離嘅小橋再行多陣就到十字分岔路。

向澳頭方向行十分鐘左右就會到瀑布，雨後嘅瀑布真係好正，雖然瀑布唔高，但水量非常多，好靚啊！

原路返返十字路口，向將軍澳村方向落山，十分鐘左右就會落返馬路，跟住大路走好快就見到巴士站離開。

難易度：★

平日行完全冇難度，落雨就記住著防滑鞋。 

打卡度：★★★★

 

雨後瀑布比平時好睇十倍：）

設施完善度：★★★★★

行入去有好多指示牌，路面都鋪得好好。

 

最後提提大家行山要準備充足；最緊要係愛惜香港大自然，自己嘅垃圾自己帶走啊！今次嘅郊遊習作係咁多，我地下次見啦！ByeBye！