愉景灣狂食 世界杯你支持邊一隊? 食住墨西哥菜睇波

世界杯就到啦，唔知大家會唔會約埋一班朋友去睇波呢?有時唔係個個人屋企都可以比好多人聚埋一齊睇波，所以出去餐廳睇波可能更加開心。今次小編想同大家介紹呢間Cali-mex，佢係美式墨西哥菜，大家可以一邊食自己支持國家嘅特色Nachos，一邊同朋友飲酒睇波，超開心。

Cali-mex之前係欖球盛事Rugby 7嘅時候都有推出相應嘅Menus，今次都一樣，為世界杯都研發咗唔同嘅薯條。

今次我地就試咗呢個巴西隊嘅薯條，佢上面有好大撻牛油果醬，入面仲有好多松露汁同蕃茄粒，份量都好多吓，咸咸香香好啱送啤酒。

講明美式就梗係要食漢堡，呢個Double Burger入面都加咗牛油果醬，啲芝士流晒出黎，好吸引。

除咗飲酒，呢度嘅無酒精飲料都好特別。例如呢個Cucumber Cooler同Virgin Margarita都好特別，Cucumber Cooler就有好清新嘅青瓜味，小編唔太好青瓜都好順口，而Virgin Margarita本身唔算好甜，但加埋杯邊海鹽就突出咗佢嘅甜味，唔飲酒嘅人不妨試下，唔洗怕第二日返工返學會宿醉。

如果覺得愉景灣太遠，其實Cali-mex仲有好多間分店，有興趣就要試下啦！