郊遊習作 華富邨隱世瀑布

今日想同大家偷下懶，去華富邨行下，順便去睇隱世瀑布。華富邨係大熱打卡熱點，因為佢嘅建築特色吸引咗唔少攝影愛好者。但郊遊習作就梗係唔係同大家去擾民啦！其實除咗建築有特色，華富邨仲有好多野睇架！之後我地再去瀑布灣睇瀑布同遺跡，估唔到咁大條瀑布同民居只係幾分鐘距離！


大家可以去搭任何去華富邨嘅交通工具入去，入村行到瀑布灣道，向海嘅方向往下走。之後就會見到向下行嘅樓梯，向左行就會見到一排面海嘅神像，據講有成8000座神像咁多架！



再向前行就見到居民自己搭建嘅泳棚，當日都見到有居民係度游水，小編咁大個人都係第一次見到泳棚咋！


沿路出返去，一路向前走，向上行樓出公園再一路沿藍色欄杆向前行，穿過瀑布灣公園就見到落去嘅樓梯。


一落完樓梯就見到瀑布啦！後面就係住宅，見到咁嘅景象真係覺得好奇特。


沿小石鋪出黎嘅步道可以行過對面嘅遺跡，但好明顯呢度已經被人當做聚腳點，好多垃圾。行過去仲可以見到好靚嘅海景。

如果有時間，可以係瀑布灣公廁行落去撞下睇日落，呢度嘅雞蛋仔日落好出名架！

難易度：★★

全程都係石屎路，不過去瀑布灣嘅遺跡會整濕隻腳，要過去最好著密頭鞋，以免鞋入水。


打卡度：★★★

8000座神像好壯觀，住宅區瀑布嘅瀑布都好特別。


設施完善度：★★★★

由於係住宅區，附近有廁所、食肆、士多，仲有居民搭建嘅泳棚。

今次係遺跡入面見到好多垃圾，令人感中非常痛心！係度小編都要再同大家呼籲，自己嘅垃圾記住自己帶走，唔好破壞咁靚嘅香港啊！今次嘅郊遊習作係甘多，我地下次見！