郊遊習作 閒遊三家村 有Feel廢置石鑛場

今日我地想同大家感受一吓漁村風情，去三家村行下，仲要去埋隱世石礦場打返個靚卡。三家村係好耐之前由三個姓氏嘅人組成嘅村落，宜家大家多數會叫三家村做鯉魚門。除咗出名海鮮美食、呢度嘅燈塔、漁村、避風塘、碼頭都吸引好多人，仲有大大個棄置石礦場，係香港少見嘅風景，好多人會去影相架！





係油塘地鐵A2出口出發，落樓梯不斷向前行，行15分鐘左右上落斜坡就見到鯉魚門呢條大大金鯉魚啦！隔離就係避風塘，一隻隻小漁船泊係度好似一幅風景畫咁。





行入海鮮街，可以我地去嘅時候係閒日下晝，間間餐廳都好悠閒，唔似西貢隨時都咁多人。
行行下見到附近居民自己畫嘅跳飛機，好多花臣，大個先黎玩都幾搞笑，打下卡又可以重拾童心。





再行多一陣就見到石灘，呢度有坐燈塔，唔少人都係度影相，不過呢度成地都係垃圾，玻璃碎同碗碟碎周圍都係，大家要小心整親。係度已經見到唔少人埋頭喪影相，果然係打卡聖地。









再行會見到天后宮，穿過天后宮係D民區，會見到指示牌去石礦場。穿過條窄巷就到啦！大家自己感受下呢度嘅風景，同心入面嘅鯉魚門差好遠啊！係感受完呢度嘅景色之後，就可以沿路出返去食海鮮，又或者搭船去西灣河繼續玩。

難易度：⭐

全程都非常輕鬆，只要乖乖地唔爬上石唔落海全程零難度。

打卡度：⭐⭐⭐⭐

石礦場境比較少見，非常好發揮。

設施完善度：⭐⭐⭐

入村前有洗手間同士多，玩完出去食海鮮，勁正！