首先係粉嶺港鐵站C出口乘搭56K小巴，係鹿頸總站落車。落車就見到有食野嘅地方，附近都冇洗手間。 向新娘潭路沿海邊行，係分叉口揀左邊路前往鳳坑及谷埔。 沿路一路風景開揚，沿沙頭角海一路行，仲可以感受悠閒嘅鄉村氣息。
中途仲見到一大排紅樹林，我地原路離開嘅時候，仲遇上退潮，同橋咀洲一樣，呢度都有連島沙洲嘅地貌，非常特別！
凰坑村一排嘅村屋、附近破舊嘅建築物同傳統廟宇都是攝影愛好者嘅最愛， 呢度仲有盈佳茶座，大家玩到攰可以係度休息一下。
再向前行冇個小碼頭，仲冇個白色小燈塔，好Instagramable，係度影相呃Like度一流！
沿路背山靠海，對面就係深圳。 跟住路牌指示繼續向谷埔進發，全程都好輕鬆，置身大自然真係好舒服，可以好好地放鬆。
難易度：⭐
全程都好輕鬆，大多都係平路，老少咸宜。
打卡度：⭐⭐⭐⭐⭐
一次過可以飽覧唔同嘅景色，山景、海景，仲有好多打卡主題。
設施完善度：⭐⭐⭐⭐⭐
指示好清晰，沿途有洗手間，茶座，小食亭，非常方便。
鹿頸至谷埔沿途有山有水，仲有村景、廢墟、碼頭、燈塔，重點係中途有補給同洗手間，唔需要太多準備，天氣好就可以出發。
沒有留言:
張貼留言