狂食尖沙咀 隱藏於巷弄之美味 叁薯的美味焗薯

厚福街多野食應該人人都知，咁你地又有冇去過佢隔離嘅巷仔搵野食呢?今日我地黎到巷仔入面嘅叁薯，佢嘅焗薯真係好好食啊！

阿二焗薯　$36

本身小編係想叫雞蛋沙律焗薯，因為之前試過真心好好食，但咁啱賣晒，果然招牌係要及早食。於是小編就叫咗呢個阿二焗薯，呢度嘅焗薯係即叫即整，配料有千島醬、芝士、蔥花，仲會用薯皮兜住個焗薯同著蓉上。真心，呢度嘅配料係錦上添花，因為本身個焗薯真係超好食，連皮都可以一齊食，烤焗嘅味道加上唔同質感嘅薯仔，口感有層次得黎又非常之和諧！

油泡大虎蝦球　$28/3隻

虎蝦球大大粒，雖然係油泡，但一啲都唔油膩。雖然佢係紅卜卜，但其實唔會辣，蝦肉爽口彈牙，剔晒Ｄ蝦腸，店主咁細心，作為食客嘅我地就食得更開心啦！

芝士焗大黑菇 $38

呢個芝士焗大黑菇入面係釀咗肉醬，超級Juicy！一開始切開見到啲肉醬以為唔會好夾，但放落口真係發覺店主真係好用心去研發食物，真係好好食！不過建議大家唔好好似我咁切開食啦，因為Ｄ汁同肉醬會爆晒出黎，浪費晒Ｄ精華！

叁薯除咗尖沙咀之外係旺角都有分店，仲連續兩年獲得米芝蓮街頭小食推介添！

叁薯

地址
尖沙咀厚福街7A號地下E舖

旺角水渠道30-32A號美星樓地下5號舖