沙田新城市公共用地 仲有高爾夫球場！

唔講唔知，原來成日逼爆嘅沙田新城市廣場，原來有唔少公共用地比大家休息放鬆，今日就等小編同你地一齊去睇吓！

廣場5樓推門出去，表面睇好似係個平台，其實出門口轉左係一個迷你高爾夫球場，大家可以帶埋球桿黎任玩；而轉右就係超大個人造草地，仲有鋪人造草嘅櫈，好天嘅時候係度影相一流！

上到去7樓，就係大家都非常熟悉嘅星光花園平台，每年聖誕呢度都逼爆，但閒日過黎其實都幾靚架！仲有得坐添！

其實9樓都有公共空間架！真係唔係特登搵都唔知！呢度係要由7樓花園行2層樓梯先上到去，上面開咗好多花，心情唔到黎轉個圈、曬下太陽都唔錯架！呢度仲有個環保農場，不過好似無乜人打理咁，出面啲花開得仲靚過農場入面嘅，不過就勝在種類夠多。

其實香港仲有好多公共空間，不過有冇呢度咁靚就唔知啦！有機會小編會親自逐一探下路，香港地方唔大，咁靚嘅地方唔好嘥咗佢！