深圳遊樂團 即日來回玩樂提案

小編都明，其實成日介紹深圳熱點，吸引還吸引，但放得一日仲要Plan行程又真係幾攰嘅，所以小編決定由今日開始不時為大家Plan下一日行程，等大家唔洗Plan就可以開開心心玩一日，係咪好抵錫呢?

今次呢條路線會去海岸城同歡樂海岸，呢2個地方都好大好多野行、好多地方可以影相，第一次去預一日就差唔多啦!小編建議大家可以係深圳灣口岸過關，係屯門、元朗、天水圍都會見到有巴士或者小巴去深圳灣。小編自己就搭開618小巴($12)，同車SAY個hi 啊Ü

Photo via Wikipedia

第一站 : 海岸城 Line Friends Cafe & Store

出咗深圳灣會見到一排大巴，隔離就有個普通巴士站，搵到M299或者M474號巴士都可以上車，坐6個站到海岸城就可以落車，行入去上一層你就會見到Line Friends Cafe & Store啦！呢度同香港Line Store最大嘅分別就係，佢係有做Cafe架！係度飲杯野食個cake，順手影返幾張相(每個位幾張)，超開心！雖然比唔上韓國Line Store咁大間，但都超多打卡位架！

營業時間：早上10時至零晨1時
預計時間：約90分鐘

第二站 : 海岸城 Hello Kitty Cafe

影完Line之後可以去埋Hello Kitty Cafe，呢間Cafe係海岸城一樓，全國只有5間分店，Hello Kitty 迷黎到呢度一定要忍住唔好尖叫！全間店嘅裝修以粉色加啡色嘅搭配，真係超級夢幻啊！

營業時間：早上10時至晚上10時

預計時間：約60分鐘

第三站 : 紅荔村腸粉

紅荔村腸粉其實係一間內地連鎖腸粉店，唔好睇佢係連鎖就覺得唔好，小編次次北上都會去食腸粉，而紅荔村腸粉就係其中一間高質腸粉店。以內地消費黎講，呢間鋪唔算平，但以我地黎講就真係好抵食！

營業時間：早上10時至晚上10時

預計時間：約30分鐘

第四站 : 歡樂海岸 

“歡樂海岸”係深圳市“十一五”旅遊規劃嘅重點項目同華僑城集團重點項目。 “歡樂海岸”位於深圳灣商圈核心，佔地面積約125萬平方米，集合文化、生態、旅遊、娛樂、購物、餐飲、酒店、會所等多元業態於一體嘅都市娛樂目的地，之前好多人去嘅TeamLab展就係係度舉行，係度除咗行街、影相、睇戲同睇吓展覧等等活動之外，仲可以睇下風景，呢度日落好靚架！

由海岸城出發嘅話，由後海站搭11號線去紅樹灣南轉9號線到深圳灣公園落車，E出口就係美樂海岸。

預計遊覧時間：約120分鐘

第五站 : 奈雪之茶

其實如果有去開深圳好多人都知道奈雪之茶啦，同港人熟悉嘅喜茶一樣，都係以深受女性喜愛嘅裝潢同少女系茶品同輕食作主打嘅排隊店，但其實奈雪之茶仲係一間麵包鋪黎架！之前小編都有同大家介紹過，歡樂海岸呢邊都有一間分店，佢地每季都有季節限定商品，小編黎親都會買佢地嘅軟包打包返屋企架！

營業時間： 早上10時至晚上10時
地址： 白石路東8號歡樂海岸購物中心2層 電話： 0755-26920339
預計時間：約30分鐘

第六站 :  友唱・全民K歌 迷你K吧

唔知大家有冇聽過迷你K吧呢？近2年內地吹起迷你K吧嘅熱潮，一個個好似電話亭嘅K吧出現係街上工，商場入面，俾大家隨時過吓K癮。歡樂海岸都有得玩，就係呢個友唱・全民K歌嘅K吧，只要用手機掃一掃就可以唱K，好方便架。

預計時間：約30分鐘

第七站 : Tony Flower

Tony Flower由內地時尚教父Tony打造，據說有提供深圳最靚嘅下午茶；裝修方面以黃色為主，未入鋪頭已經見到由黃色花朵砌成嘅兔仔同復古車，行入鋪頭之後第一個感覺就係好黃啊！大家不妨去呢間被譽為深圳最美Cafe之一嘅Tony Flower食餐飯啦！

營業時間：早上10時至晚上10時

地址： 白石路東35號歡樂海岸曲水灣A-6C

電話： 0755-23888882

預計時間：約60分鐘

第八站 : 深圳灣公園-深圳灣口岸

全日係咁食食食，係時候做下運動，小編就建議大家可以沿深圳灣公園行返出去深圳灣口岸，又或者租Ofo小黃車踩單車出去，浴路一邊消耗卡路里，又可以睇到深圳灣嘅夜景，不過要睇住時間，Check一Check自己想搭嘅車嘅尾班車係幾點，如果唔係就要去皇崗先有24小時通關啦！

預計時間：

行路：約100分鐘

單車：約75分鐘

今次嘅路線分享就到呢度啦，小編會陸陸續續帶大家去更多地方玩，記住留意我地嘅更新啦！想知道更多深圳遊樂資訊，可以去以下網址睇吓架！
https://goo.gl/gJ2u5L