賞花情報 長沙灣簕杜鵑隧道

成個3月個個都係度講櫻花，恩恩都唔輸蝕去咗長洲同將軍澳賞櫻，突然小編見到簕杜鵑隧道殺出重圍上熱搜，好奇心下決定同欣欣去一探究竟，睇下係咪真係咁靚！

係長沙灣C2出口，一出就係元州邨，行入邨幾步就見到賞花人潮。如果你想好似欣欣咁係隧道前影相，係好有可能要排隊架！

呢條隧道其實唔算好長，不過如果你只係想影吓相打個卡其實都好足夠，前半段會比較多花，大家都可以係中間露天位影返入去，就唔洗係前面排隊啦，一樣都好靚架！

雖然條隧道唔似外國啲愛的隧道咁長，但因為紫紅色嘅花包圍住隧道，都好特別！更何況「細」先有香港特色啊！

恩恩Tips:

• 我地今次好不幸地張張相都幾乎影到有途人，所以建議大家係閒日或者朝早去影，會少啲人。
  

• 今次我地用咗廣角，會比較易就位，人企係中間一影都好靚。
  

• 邨內仲有其他地方都種咗簕杜鵑，用好角度可以影到小花海。