呢條路線可以一次過體驗同見到特別嘅地質風貌、古村、鄉郊氣息同客家圍村文化，成大片紅色嘅石地真係好壯觀！不愧係世界地質公園啊！紅日仲有街渡來往馬料水同荔枝窩，行入去又得、搭船出返黎都得！入去記住食埋客家菜先好走啊！
馬鞍山入面有條好簡單嘅路線，就係水浪窩！大家可以早少少去水浪窩，呢度有座仿古觀星台，好似古堡咁，好有古代氣息，大家可以係度野餐，之後再出泥涌影相，泥涌都係著名嘅天空之鏡，呢度天地一色，真係好浪漫啊！有興趣仲可以黎放風箏添！之後可以去埋BBQ先返屋企，一日入面睇晒山海兩色，野餐又得ＢＢＱ亦得，行程好豐富！
嘉道理農場每一季都有唔同嘅花可以欣賞，三四月會有草豆蔻 、白花羊蹄甲 、宮粉羊蹄甲、大鴛鴦茉莉 、山茶、繡球仲有好多好多當季花朵盛開。仲可以上觀音山頂峰睇下自然美景；係四柱擎天下眺望林村；又或者去熱氣洞感受「龍的氣息」。如果你唔想行到身水身汗仲可以搭車遊覽大部分景點，邊個話懶人就唔可以親親大自然架？
放假不如去離島玩啦！就算係假日，長洲其實都有人少嘅地方，經小長城行去南氹灣睇下天后廟之後去挑戰張保仔洞，睇下奇石、吹下海風、挑戰下張保仔遺址，長洲仲出名多野食添！
另一個推薦嘅離島係橋咀，呢排天氣開始熱，中午時分應該夠熱落得水、呢度都有燒烤場、又或者去行下連島沙洲，睇下各式各樣大自己比我地嘅禮物，會發現其實香港嘅風景一啲都唔會差過其他地方！勁有渡假Feel！
放假想踩單車睇風景？又唔想黎黎去去都大圍沙田大埔馬鞍山，可以試下去天水圍踩單車入尖鼻咀，路線雖短但勝在夠多野睇！沙橋村嘅蠔殼灘、濕地公園嘅紅樹林同侯鳥、成片嘅漁排，好特別架！
如果你有更好嘅路線推薦，記住同小編講，等小編都去感受人你眼中嘅美啦！祝大家係復活節吸多啲新鮮空氣，復活下自己啦！
沒有留言:
張貼留言